پ پ هڪ ڀيرو ٻيهر پنهنجي اتحادي حڪومتي جماعت ن ليگ کي اعتماد ۾ نه وٺڻ جي ميار ڏيندي حڪومتي اتحاد ڇڏڻ جي ڌمڪي ڏئي ڇڏي.
پ پ جي مرڪزي اطلاعات سيڪريٽري شازيا مري ميري ٽائم اينڊ سي پورٽ اٿارٽي جي قيام جي منظوري جي فيصلي تي ردعمل ڏيندي چيو ته وفاقي حڪومت مسلسل اهڙا فيصلا ڪري رهي آهي، جن تي اعتماد ۾ نه پيو ورتو وڃي، پاڪستان ميري ٽائم ايند سي پورٽ اٿارٽي جي قيام تي اعتماد ۾ نه ورتو ويو، شايد ن ليگ کي ان ڳالهه جو اندازو ناهي.
هن چيو ته اٿارٽي جي قيام تي فيصلي کان سنڌ حڪومت ۽ پ پ ٻنهي کي بي خبر رکيو ويو، جنهن ڏينهن حمايت ختم ڪنداسين ته وفاقي حڪومت به ختم ٿي ويندي.
سندس چوڻ هو ته گهڻي وقت کان اهو مطالبو ڪري رهيا آهيون ته گڏيل مفادن واري ڪائونسل جو اجلاس گهرايو وڃي، 11 مهينا گذري ويا پر اجلاس ناهي گهرايو ويو، آئين جي کليل ۽ مستقل ڀڃڪڙي ڪئي پئي وڃي.
واضح رهي ته ان کان اڳ پ پ ڪينالن جي معاملي تي به ن ليگ سان پنهنجي خدشن جو اظهار ڪيو هو، جڏهن ته پ پ چيئرمين بلاول ڀٽو زرداري انٽرنيٽ جي بندش تي به وفاقي حڪومت تي ڇتي تنقيد ڪئي هئي.
