صدر آصف علي زرداري ۽ وزيراعظم شهباز شريف عالمي برادري کان مطالبو ڪيو آهي ته ڀارت کي والاريل ڪشمير ۾ انساني حقن جي ڀڃڪڙين کان روڪي.
ڪشميرين جي حق خوداراديت جي ڏهاڙي تي جاري ڪيل پيغام ۾ صدر آصف علي زرداري چيو ته پنج جنوري 1949ع تي ڪشميرين جي حق خوداراديت جو ٺهراءُ منظور ٿيو هو، ڀارت ستن ڏهاڪن کان ڪشميري عوام جي حق کان محروم رکيو آهي.
سندن چوڻ هو ته ڀارت والاريل ڪشمير جي آبادي ۽ سياسي ڍانچي کي تبديل ڪري رهيو آهي، عالمي برادري ڪشميرين کي حق خوداراديت ڏيارڻ جي ذميوار آهي.
صدر آصف علي زرداري چيو ته عالمي برادري ڀارت کي ڪشمير ۾ انساني حقن جي ڀڃڪڙين کان روڪي، پاڪستان ڪشميري عوام جي حق خوداراديت جي جدوجهد ۾ سياسي، سفارتي ۽ اخلاقي حمايت جاري رکندو.
ڪشميرين جي حق خوداراديت جي ڏهاڙي تي جاري ڪيل پيغام ۾ وزيراعظم شهباز شريف چيو ته هر سال پنج جنوري کي ڪشميرين جي حق خوداراديت جي ڏهاڙي طور ملهايو ويندو آهي، ڪشميري عوام ستن ڏهاڪن کان خوداراديت جو حق استعمال ناهي ڪري سگهيو.
سندس چوڻ هو ته ڀارت ست ڏهاڪن کان والاريل ڪشمير ۾ انساني حقن جي ڀڃڪڙين ۾ ملوث آهي، حق خود اراديت، گڏيل قومن جي چارٽر ۽ عالمي قانون جو بنيادي اصول آهي.
وزيراعظم شهباز شريف چيو ته اڄ وقت آهي ته گڏيل قومن سميت عالمي برادري پنهنجي واعدن تي عمل ڪري ۽ اهڙا قدم کنيا وڃن جنهن سان ڪشميري عوام حق خوداراديت استعمال ڪري سگهي، عالمي برادري ڪشميرين جي بنيادي حقن ۽ آزادين جي بحالي جو به مطالبو ڪري
