چيمپيئنز ٽرافي: افغانستان خلاف ميچ نه کيڏڻ جو دٻاءُ، جوز بٽلر وڏو بيان ڏئي ڇڏيو

انگلش ڪرڪيٽ ٽيم جي ڪپتان جوز بٽلر چيو آهي ته هو افغانستان ڪرڪيٽ ٽيم خلاف ميچ جو بائيڪاٽ ڪرڻ کي ” صحيح طريقو “نه ٿو سمجهي.
ڀارت خلاف پنجن ٽي ٽوئنٽي ميچن تي ٻڌل سيريز کان اڳ ڪولڪتا ۾ پريس ڪانفرنس دوران جوز بٽلر چيو ته هن ۽ سندس ٽيم ” ماهرن “ سان مشاورت ڪئي آهي، افغانستان خلاف چيمپيئنز ٽرافي ميچ شيڊيول موجب ٿيندي.
هن چيو ته” سياسي صورتحال تي هڪ رانديگر طور اوهان ڪوشش ڪندا آهيو ته پاڻ کي جيترو ٿي سگهي معاملي جا تفصيل حاصل ڪيون.“
هن وڌيڪ چيو ته انگلش ٽيم مئنيجمينٽ کي معاملي جي وڌيڪ ڄاڻ آهي، انڪري هو مينز ٽيم جي مئنيجنگ ڊائريڪٽر سميت ٻين سان رابطي ۾ آهي.
سندس چوڻ هو ته هو سمجهي ٿوته افغانستان خلاف ميچ جو بائيڪاٽ صحيح طريقو نه آهي، ، جڏهن ته مردن جي ٽيمون ايندڙ مهيني چيمپيئنز ٽرافي ۾ هڪ ٻئي سان مقابلو ڪرڻ لاءِ تيار آهن.
انگلش ڪپتان چيو ته ان معاملي تي رانديگرن تي گهڻو دٻاءُ نه آهي، افغانستان ۾ عورتن جي تعليم تي بندش ۽ طالبان جي پاليسي تي معلومات حاصل ڪئي آهي.
واضح رهي ته چيمپيئنز ٽرافي ۾ افغانستان خلاف ميچ کان اڳ، 160 کان وڌيڪ برطانوي سياستدانن انگلينڊ اينڊ ويلز ڪرڪيٽ بورڊ کي اپيل ڪئي هئي ته هو عورتن جي حقن جي لتاڙ تي طالبان حڪومت خلاف سخت قدم کڻي ۽ افغانستان خلاف ميچ جو بائيڪاٽ ڪري.
انگلينڊ ۽ افغانستان جو ميچ 26 فيبروري تي لاهور ۾ شيڊيول آهي، سياستدانن جو مطالبو آهي ته اها ميچ لاهور ۾ نه کيڏي وڃي ۽ طالبان کي سخت پيغام ڏنو وڃي ته انساني حقن جون ڀڃڪڙيون برداشت نه ڪيون وينديون.
ليبر پارٽي جي ميمبر ٽونيا انٽونياٽزي جي لکيل خط تي ريفارم پارٽي جي اڳواڻ نائجل فراج ۽ ليبر پارٽي جي اڳوڻي سربراهه جيرمي ڪوربن سميت ڪيترن ئي سياستدانن ڪيون هيون.