لاس اينجلس ۾ لڳل باهه بي قابو ٿي وئي آهي، جنهن سبب 5 ڄڻا سڙي فوت ٿي چڪا آهن ۽ اربين ڊالرز جو نقصان ٿيو آهي.
پرڏيهي ميڊيا موجب، آمريڪي رياست ڪئليفورنيا جي شهر لاس اينجلس ۽ ان جي ڀرواري علائقن ۾ موجود ٻيلن ۾ لڳل باهه پکڙجي وئي آهي، جنهن جي نتيجي ۾ 50 ارب ڊالر کان وڌيڪ نقصان جو ڪاٿو لڳايو ويو آهي.
تيز هوائن سبب ان باهه کي ڪيترن ئي ايڪڙن تائين پکيڙي ڇڏيو آهي. هن وقت تائين 5 ڄڻا سڙي فوت ٿي چڪا آهن ۽ ڪيترائي ماڻهو زخمي ٿي چڪا آهن. هڪ هزار کان وڌيڪ گهر ۽ ڪاروباري مرڪز سڙي رک ٿي ويا آهن.
فائر فائٽرز ٽن مختلف هنڌن تي باهه وسائڻ ۾ مصروف آهن، جڏهن ته متاثر علائقن جي رهواسين کي فوري طور علائقو خالي ڪرڻ جو حڪم ڏنو ويو آهي.
اربع جي رات هالي ووڊ هلز ۾ لڳل باهه پبلڪ پارڪ هالي ووڊ بائول سميت ٻين مشهور هنڌن تائين پکڙجي وئي آهي، باهه سبب ميٽروپوليٽن علائقي ۾ ڪوسٽ آئلينڊ کان پسادينا تائين رهندڙ 130,000 کان وڌيڪ ماڻهن کي علائقو خالي ڪرڻ جا حڪم جاري ڪيا ويا آهن.
ٻئي پاسي صدر جو بائيڊن ڪئليفورنيا ۾ لڳندڙ باهه سبب پنهنجي آخري پرڏيهي ملڪي دورو رد ڪري ڇڏيو آهي ۽ واشنگٽن ۾ ئي رهڻ جو فيصلو ڪيو آهي.
هوڏانهن لاس اينجلس جي ميئر ڪرين بيڪس موجب، رياست جي مختلف حصن کان ايندڙ فائر فائٽرز باهه وسائڻ ۾ مصروف آهن، جڏهن ته باهه تي قابو پائڻ لاءِ هوائي آپريشنز پڻ جاري آهن.
باهه سبب ٿيندڙ تباهي کي لاس اينجلس جي تاريخ ۾ سڀ کان وڏي تباهي قرار ڏنو پيو وڃي.
