پ پ چيئرمين بلاول ڀٽو زرداري چيو آهي ته ڊجيٽل اسپيس خطري ۾ آهي، نوجوانن کي هاءِ اسپيڊ انٽرنيٽ ۽ ڊجيٽل رائٽس لاءِ حڪومت جي سامهون مزاحمت ڪرڻي پوندي.
سکھر آءِ بي اي ڪيمپس ۾ شاگردن کي خطاب ڪندي بلاول ڀٽو زرداري چيو ته مان فخر محسوس ڪريان ٿو ته هن يونيورسٽي جو بنياد منهنجي امڙ بينظير ڀٽو رکيو، هي ٻج وڻ بڻجي ويو ۽ عالمي سطح تي پنهنجي ساک رکي ٿو، هي هڪ بهترين ادارو آهي، جتي ٻين صوبن مان به ماڻهو تعليم حاصل ڪرڻ ايندا آهن.
هن چيو حڪومت جو ڪم آهي هر شئي کي پنهنجي ڪنٽرول ۾ ڪرڻ، اها توهان کي به ڪنٽرول ڪرڻ جي ڪوشش ڪندي، توهان جي ادارن کي به ۽ توهان جي شين کي به پر نوجوانن کي حڪومت کي قابو ۾ رکڻو آهي، نوجوانن کي حڪومت جي انهن ڪوششن جي سامهون مزاحمت ڪرڻي آهي، توهان کي پنهنجا حق حاصل ڪرڻا آهن.
سندس چوڻ هو ته هر نسل پنهنجي حق لاءِ جدوجهد ڪئي آهي، جمهوريت اسان کي تحفي ۾ نه ملي، ان لاءِ جدوجهد ڪئي سين، نوجوانن پنهنجي تعليم، پنهنجي آواز ۽ پنهنجي هنر سان هڪٻئي پويان سڀني بندوقن وارن کي شڪست ڏني، انگريزن جي دور کان نوجوان پهرين صف ۾ رهيو.
بلاول ڀٽو زرداري چيو ته ضياءَ جو دور ۽ جنرل مشرف جو دور سڀني جي سامهون آهي پر هن دور ۾ ڊجيٽل اسپيس خطري ۾ آهي، پاڪستان کي معاشي طور تي مضبوط بڻائڻو آهي ته ٽيڪنالاجي بنيادي اهميت رکي ٿي، پاڪستان کي جيڪڏهن ون ٽريلين ڊالر جي معيشيت بڻائڻو آهي ته پنهنجي ٽيڪس سيڪٽر کي آزاد ڇڏڻ گهرجي، اسان جي نئين نسل کي جمهوري ۽ پرامن طريقي سان پنهنجي حقن لاءِ جدوجهد ڪرڻي پوندي، اسان کي قانوني طور تي اهو حق حاصل ڪرڻو پوندو ته هر شهري کي هاءِ اسپيڊ انٽرنيٽ ملي، نوجوانن کي اڳتي اچڻو پوندو.
پ پ چيئرمين چيو ته ڊيٽا پرائيويسي توهان جو حق آهي، نوجوان ڊجيٽل بل آف رائيٽس لاءِ مون کي تجويزون ۽ مطالبا ڏين، اسان گڏجي جدوجهد ڪنداسين ۽ اسلام آباد ۾ ويٺل انهن پوڙهن کي سمجهائينداسين، جن کي نه سوشل ميڊيا جو پتو آهي نه واٽس ايپ جو، نه اسٽريمنگ ويب سائيٽس جو ۽ نه گيمنگ جو علم آهي.
